I RACCONTI DI CARLO PAGNINI IN PILLOLE

Ben o mèl, sa chel “tran tran”, inesorabilment el temp el pasèva e neatre, anca sa tantle dificoltà, a crescémmi come la gramégna in ti camp.
Par cerché da tirè avanti tutta cla “baraca” méj che s’ pudéva, senza fè tant svanzigh, a i avémmi da contribuì, grand e pcén, cercand d’armediè el pió posibil giorne par giorne.
De chi temp par gì a imparè un mestir tuchèva paghè mo fortunatament Cesarini, el padron dla butega da barbir in do’ è ch’ lavrèva Elvino, dop dla mort del Ba’, non sol ann’à pió vusud un centesim mo j à anca lascèdi le manc ch’ l’argaravlèva da i client.

Melio invec, ch’ l’aveva ancora sol tredic ann, par entrè a la Montecatini, l’à avud imprest dal zi’ Cesre j ann ch’j manchèva.
Le mi’ surèli le i à truvèd da lavrè saltuariament in tipografia; una da Melchiorri e una da Federici.
E me, dop del barbir sa mi’ fradell, del sartor sa mi’ cugnèd, e tanti atre lavor che saria tropp longh a dì, a so’ gid a fè el mecanich dle biciclett in via Castelfidardo da Fauso Belli el fiol dla Pipetta (quella ch’ la vendeva le cresciulén, i maritozz e la tiramolla d’avanti a la scola Garducci). S’ pó dì che ogni volta che s’ purtèva a chèsa “la quindicéna” l’era una festa.

Neatre a démmi fin a l’ultim centesim ma la Ma’ e lia i meteva, ben ordinèdi, sóra el tavlén e po’ la cmincèva la cerimonia dle division: questi par l’afétt, questi par paghè un po’ de buff in tle butègh, questi par el calzulèr e via via fin ch’ la i arivèva a fè armana poch centesim anca par i nostre divertiment: “un acquilott” (cinquanta centesim) ma i pió grand, “una bicicleta” (vent centesim) ma i mezèn e “una mosca” (dic centesim) ma me che chiarament, esend el pió pcén, a ‘niva sempre par ultim.

Quant la me consegnèva ch’i dó sold la tachèva immancabilment sa la solita manfréna: “Carlén!… Par adess, magnè t’à magnèd, bud t’à bud, vestid t’ sì vestid… donca, sti dic centesim, téni dacont…”
Ma me me niva sempre voja da rispondi lé par lé: “Alora, s’ann’i poss spenda com a voj, téni par te!…”. Mo prò, pensandi ben, a capiva ch’il fèva par insgnèm el valor di sold e non parchè la i era roncia. Acsé a chiapeva chi dó baioch e a i meteva in tle sacoc tutt cuntent come s’a fussa stèd un posident.

Tagged with →  
Share →

Lascia un commento

Il tuo indirizzo email non sarà pubblicato.