I RACCONTI DI CARLO PAGNINI IN PILLOLE

Dop dla mort de mi’ pèdre, Turén e la Genoèffa i c’aveva dat in afétt, pió par cumpasion ca ne par atre, la vechia osteria de via dla Fonderia. Anca parchè lori i s’era trasferid, sa tutta la baraca, in tla Strèda Granda (ogg via Vincenzo Rossi). Propi in tel canton in do’ ch’ c’era i vascon dla Furnècia d’ Ceccolini. (ogg angol de via Manàra)
In t’un cla chèsa, par neatre nova e bela, c’era al piènteren un salon retangolèr sa una fnestra e una porta ch’ le dèva in tla strèda…. In tel mezz dla paret, de front a l’entrèda, c’era un gran spurtel de legn sa un catorc ch’el s’apriva sóra un pozz scur e profond da fè paura.
Ste pozz el confinèva sa ‘l cortil d’un antre casant.

A destra del spurtèl, propi in t’un spigol, c’era una porta sa tre scalén ch’ la giva a fnì in t’un fond senza piancit ch’el chiapèva la luc da un fnestrén sa un’inferièda.
De sóra c’era dó cambre comunicant e un cess a la turca da in do’ è ch’ partiva un scalinon ch’el giva a fnì in tla sufétta.
In tla préma cambra durmiva, in t’un lett a dó piazz, mi’ mèdra sa le mi’ sureli e in t’un cl’atra, sempre in t’un lett matrimonièl, a durmiva me insiem sa i mi’ fradei.
Ma neatre pareva da essa dventèd sgnor.

Mi’ mèdra sa l’aiut de tutti la i avéva sistemèd, propi in tel mezz dla sèla, una stufa “Parigéna” ch’ la giva a legna e a carbon.
La i aveva mess una vetréna davanti al spurtel del pozz in mod che nisciun il pudessa aprì gnanca par sbaj, dop ch’ la m’avéva sorpres a saltè da una part a cl’atra a spindulon in tla corda vruchièda in tla carugola. De fianch ma la stufa la i avéva pugèd un tavlén – ch’aveva costruid Berto mi’ cugén – grand un metre quadrèd ch’el se slunghèva fin a poch manch de dó metre.
A destra dl’entrèda, sotta un gran spech’ ch’el spingiulèva da ‘l mur, c’era un casson de chi vech’. El serviva sopratutt ma mi’ fradel ch’el fèva el barbir, quant capitèva da fè la barba o i capéi ma j amich e conoscent ch’ i l’aspetèva a chèsa nostra, dop d’una giurnèda lavorativa o in ti giorne de festa.

L’afétt ann’era un bel po’ prò s’ fèva sempre fadiga lustess a paghèl tutt i mes. Specialment in t’un chi period che, tra tutti, s’ armedièva poch o gnent.
Pió d’una volta la Genoeffa, pasand d’avanti chèsa, la s’afacèva in tla porta e la lascèva la ricevuda lustess.
Mi’ mèdra scusandse i dciva: “Avé pacenza Genoeffa, adess apéna ch’a poss a ve vengh a purtè i sold.” “Mo che purtè e purtè!” la ribateva la Genoeffa: “In do’ ch’a i avé la testa? An v’arcurdè pió ch’a m’j avé già dati? Badè a pensè ma chi fioi piutost che sa me a sit sempre in pèri, stèd tranquélla!”.

La Genoeffa la fèva finta che par chel mes a i ermi a post e la s’alontanèva sorident.
Mi’ mèdra invec, senza fès veda da nisciun, la giva in tel fond a sciughès j occh’.

Tagged with →  
Share →

Lascia un commento

Il tuo indirizzo email non sarà pubblicato.