I RACCONTI DI CARLO PAGNINI IN PILLOLE

Era chièr come la luc del sol che, par pudè tirè avanti, tra tant dificoltà, ognun aveva da fè la su’ part senza aspetè che cascasa la mana dal cél. E neatre, grand e pcén, quest a l’avémmi capid da un bel pezz.
Elvino el fèva el barbir da Cesarini par el Cors, Melio el lavrèva a la Montecatini, l’Argia e la Maria le lavrèva un po’ in tipografia e un po’ qua e là do’ ch’ capitèva e me a giva sa mi’ medra e mi’ zia (la moj de Trenz) a fè i matarazz. Ann’era de sigur un lavor pericolos mo prò l’era pesantén ben.

Se tratèva da truvè un spiazz; un cortil, una logia opór, quant c’èra el temp cativ, una capana. In poch parol un post in do è che s’ pudéva metta una paca de porta sóra dó cavalett. Ma me naturalment le me purtèva sa lorle pió par non lascèm in gir ca ne par l’aiut ch’a pudéva dè. Comunque el mi’ compit l’era guèsi sempre quell da scardè i patofol dla lena incudighida.
A dirò che, nonostant ch’ an fóssa propi un gran divertiment, a i era cuntent lustess da essa util anca me. Naturalment, tra tutta cla polvra an fèva atre che stranudè e gratèm parchè la polvra la dèva un gran rusóm par tutt el corp. In pió, qualca volta, a i armedièva anca le pulc e i bdoch’. Prò me an me lamentèva parchè mi’ zia la cantèva sempre com un rusignol.

Paréva d’avé un fonogrof tachèd ma le urecch’. Quest l’era un lavor ch’ le fèva spess. Invec un servizi ch’ le fèva un pèra d’ volt al mes l’era quell d’arnacè, lavè e sciughè i pagn di suldèd del “Sesto C.A.R.”. Sia par quei dla Caserma Cialdini come par quei dla caserma Del Monte. J arnac i fèva in chèsa mentre par lavèi, sciacquèi e sciughèi le giva in tel “Valèd dl’ Albèn” propi sotta la mura di Capucén.

Par me quella l’era l’ocasion bona par cerchè da peschè qualca inguìlla e sopratutt par fè el bagn tutt nud bréll sa i mi’ cumpagn. Po’ quant tuchèva gì a tò e arpurtè cle divis in caserma, el divertiment l’era incredibil. Muntè in tla caretta quant la i era svoida e calchèla quant la i era péna. Me a gudéva un gran bel po’ guardand ma la gent ch’ la ce salutèva e la ce sorideva. Me paréva da essa in t’una caroza da favola tirèda da dó cavai bianch… e mi’ zia la canteva!… La cantèva com un merle.

Tagged with →  
Share →

Lascia un commento

Il tuo indirizzo email non sarà pubblicato.