I RACCONTI DI CARLO PAGNINI IN PILLOLE

Me a pens che, se capitasa d’avé da un qualdun un’automobil de regal e, invec da gradìla, s’ cminciasa a controlè le misur, el color, i post, el consum e via dicend davanti a chi i la i à regalèda, a cred propi ch’an saria un comportament delichèd un gran bel po’. Cerchè da capì, l’é par l’é, se le gomm le i è consumèd, s’ la i à la rugina, quanti chilometre la i à fatt, se la bateria la i è cariga o scaeiga, se s’ trova i pezz d’ rigambi, invec da ringraziè, l’unica roba giusta da fè saria quella da lascèla malé e gì via a testa basa senza gnanca arvultès in dria par salutè. Presapoch saria come se par leggia un libre s’cercasa da fè le indagin de tutt le parol invec da cerchè da capì el significhèd ch’ le à. Controlè le virgol e i punt, stabilì s’ l’è el dialett de Pantèn, del Port, de Muraja, de Soria, de Santa Vendra (o Santa Veneranda), opor dla Cità, (del Centre, del Borgh, del Ghett, del Trebbi) forse, anca in t’un ste chès, saria méj a lascè perda préma da cmincè a sfujèl.

Second me un libre, ch’ann’à gnent da insgnè ma nisciun e ch’el nasc sol dal desideri d’arcuntè, ma un parent, ma un amich, ma un conoscent o ma un curios, una spec de favola come tantle senza nisciun’antra pretesa, l’avria da essa chiapèd par quell ch’ el rapresenta e bona nott tel scur.
Par esempi, vést che pió o mén ma tutti el ciarvell, ogni tant, l’è bon da parturì qualch’idea meza strampalèda [senza savé dì né parchè, né par chi, né par co’ l’è ch’il fà], è naturèl che anca ma me, m’è capita da vlé dì qualco’ d’un qualco’ ma qualdun senza savé ben par che motiv.

Par mazè el temp an pó essa de sigur parchè mentre che neatre a pensém da mazè el temp, el temp el maza ma neatre senza nisciuna pietà, donca… An s’ pó gnanca dì ch’ al fém par perda el temp vést e considerèd che, propi el temp, non sol ann’el pudém perda mo, ann’el pudém gnanca truvè, risparmié, cumprè, spenda, regalè, imprestè, fermè, slunghè… In conclusion el temp el fà tutt quell ch’j pèr senza stè a sentì gnent ma nisciun! Anca se la gent la continua a dì: “Ann’ò un minut de temp da perda”, “Ann’ò el temp gnanca par bata j occh’ ”, “An poss perda el temp par nisciun motiv”, “Ann’ò mèi el temp par ripusè un minut in pèc”, “Me pasa sempre el temp in t’un lamp!”…

In ogni mod, anca se una ragion precisa in la cnosc nisciun, me un po’ de temp par scriva qualco’ d’un qualco’ a l’ò vusud armediè lustess! Forse sarà parchè a so’ convint da pudel fè, o forse parchè me pièc da fèl, o forse parchè ann’ò voja da fè gnent’atre, o forse parchè a so’ convint ch’ sia méj ca ne a fè la guera, o forse parchè a cred da non rubè gnent ma nisciun, o forse parchè in fin di cont pudria anca essa un po’ la storia dla vita mia… Sia com voja essa poch importa! Me al fac e dop quel ch’ suced suced. Tant anca se tutt quest l’ avessa da servì sol par me… pacenza! S’ann’avessa da gambiè gnent… pacenza! S’ l’ avessa da essa una mania come tantle atre… pacenza!

Comunque, Vojatre ch’a i avé chiapèd sti foj in tle mèn, s’a vlé, a i pudé leggia, giudichè, critichè, rifiutè, trascurè, ignorè e, in tl’ultim, a i pudé anca butè via del tutt che tant an gambia gnent de sigur. Me, com’ à già détt Pasqualon, a ve poss sol ardì:

“Legé pur, sa vle sentì, / tutt le mi minchionarì.”

Tagged with →  
Share →

Lascia un commento

Il tuo indirizzo email non sarà pubblicato.