I RACCONTI DI CARLO PAGNINI IN PILLOLE

Delelmo in tel 1901, a l’età de 14 ann, (l’era poch pió d’un fiulén), sicom el padron il tratèva malament, l’à lascèd el lavor di camp e l’à abandonèd la su’ faméja par gì a lavrè in Germania.
Par chiapè una decision come quella a l’improvis a cred che ce sarà vusud un bel coragg.
L’è partid senza savé gnanca da che part la i era la Germania.

Quell ch’ l’à d’avé patìd i l’avria pudud arcuntè sol ló. Ann’à gnanca mèi capid parchè in Francia c’è i frances, in Spagna i spagnol, in Italia j italièn, invec, in Germania c’è i tedesch?!
Comunque, mentre ch’el pasèva da un post a ch’ l’atre par truvè da sbarchè el lunèri, quatre ann dop, osia in tel 1905, anca la Deléna sempre a 14 ann mo prò insiem sa tutta la faméja: (pèdre, mèdra, fradèi e surèli), la i è partida par gì in America a lavrè in ti camp de cuton.

Acsé, dop d’avé girèd mezz mond, Delelmo l’era fnid in Svézzra a Montreaux a lavrè in t’una fabrica de tabach, e la Deléna a Vevey in tla fabrica dla cicolata (la Nestlè).
È stèd par ste motiv che tutt dó, in ti giorne de festa, i s’incuntrèva par chès a Losanna in t’un circol de italièn.
In tel 1909, ló l’aveva 22 ann e lia 18, i s’è incuntrèdi par la préma volta: i s’è piaciud, i s’è innamorèd e, in quatre e quatrott, i s’è spusèd.

Acsé, da Delelmo e la Deléna, ancora una volta, dop dl’Argia del 1913 ch’la i è campèda poch, Elvino-Argeano-Anacleto del 1915, Carlo-Vittorio-Andrea del 1916 ch’ l’è mort anca ló a pochi mês, Aurelio-Amelio (Melio)-Mario-Adriano del 1919, Argia-Francesca-Martina del 1920, Maria-Serafina-Caterina del 1925, el giorne 14 del mes de luj del 1928 a so’ nèd me; Carlo-Gaetano-Guerrino (par tutti Carlén) l’ultim de sett fioj.
A i ermi una faméja felic!

Mi’ pèdre l’aveva 41 ann e mi’ mèdra i n’aveva 37.

Tagged with →  
Share →

Lascia un commento

Il tuo indirizzo email non sarà pubblicato.