I RACCONTI DI CARLO PAGNINI IN PILLOLE

Préma da cmincè a gì a scola al “Gardócci” tuchèva avé fatt el varól in t’un bracc.
Par ste motiv una maténa, come tutt quei dl’età mia, a giva anca me, sa mi’ mèdra, in cità.
Traversand, sa ‘l sol a piomb, piaza “Vittorio Emanuele II” (ogg piazza del Popolo), e trovandme davanti a l’imponenza del Palazz Duchèl, a m’ so’ sentìd, stranament, com immers in t’un mond de favol.

Poch distant da l’entrèda c’era anca una caroza scuperta sa le stangh tachèd in t’un cavall maron che, sa ‘na gran tranquélità, el magnèva el falasch sa la testa infilzeda in t’una bala.
M’è pars che, de tutt la gent ch’i girèva d’intorne, ma ló ann’j impurtasa un gran chè, vést che, a un cert punt, l’à alzèd la coda e sa una gran indiferenza la fatt i su’ bsogn senza preocupès minimament de nisciun.

Par un fiulén, de poch manch de sei ann com a i era me in tel ‘34, campèd fin a chel moment in t’una casnéna a schiera da un pièn, la luc abagliant del sol leon, riflessa in t’un cla facèda chièra e maestosa, la trasformèva chel palazz in t’un castell meraviglios.

Le logg, le i era un bel po’ pió grand de tutta la chèsa in do’ ch’a stèva me insiem sa la mi’ faméja.
Mentre che mi’ mèdra, strignendme fort una mèn da fèm guèsi mèl, la me straginèva in t’un chel pezz de landa infughèda, la meravija e sopratutt la curiosità la m’à fatt dmandè chi è ch’ pudeva stè in t’un chel gran casermon.

La risposta la i è stèda questa: “Malé stà d’ chèsa una spec del Re de Pesre! Se te t’ va’ a scola e t’impèr, ben ben, el tagliano forse un giorne, chel palazz, te l’ pudrà gì a veda anca d’ dentra. Mo, sa ‘l dialett che t’impèr da me, te sarà destinèd a vedle sempre sol da d’ fora”.
Né mè né lia, in in t’un chel moment precis, a c’ pudemmi immaginè che, un bel giorne, propi el su’ dialett l’avria fatt el mirècol da purtèm dentra chel “Palazz”, facendme pasè adiritura da la porta principèl, invitèd propi dal “Re de Pesre”.

Tagged with →  
Share →

Lascia un commento

Il tuo indirizzo email non sarà pubblicato.